கமல் ஹாசனும் உலக நாயகனும்

நான் சினிமா பார்க்க ஆரம்பித்ததில் இருந்து மிகத்தீவிர கமல் ரசிகன். எந்த அளவு கமல் ரசிகன் என்றால் ரஜினி படம் பார்ப்பது ஒரு மிகப்பெரிய குற்றம் என நினைக்கும் அளவு தீவிர கமல் ரசிகன். எனக்கும் எனது நண்பர்களுக்கும் இடையிலான கமல்-ரஜினி விவாதம் பெரும்பாலும் தமிழ் சினிமாவை ரட்சிக்க வந்த கடவுள் கமல் ஹாசன், அதனை கெடுத்து குட்டிச்சுவராக்கும் சாத்தான் ரஜினி என்கிற தொனியிலேயே அமைந்திருக்கும். கமல் படங்கள் எப்போதும் அவை வெளிவந்த காலத்தை விட முன்னோக்கியதாகவே எனக்கு படும். நடிப்பில் கமலை மிஞ்ச ஒரு நடிகன் இந்த உலகில் பிறந்துவிட கூட முடியாது என்றே எண்ணிக்கொண்டிருந்தேன்.

கமல் ஹாசன் எனக்கு அறிமுகமானது எனது பதின் ஓராம் அல்லது பதின் இரண்டாம் வயதில். நான் பார்த்த முதல் கமல் படம் கல்யாண ராமன். பெரும்பாலும் நான் பார்த்த முதல் சினிமாவும் அதுவாகவே இருக்கும். இரண்டாவது படம் சிகப்பு ரோஜாக்கள். அந்த இளம் வயதில் இரண்டு படங்களிலும் தோன்றிய நடிகர் ஒருவரே என்பதை புரிந்து கொள்வதே எனக்கு மிகவும் சிரமமாக இருந்தது. அதன் பிற்பாடு, சிங்கார வேலன், அபூவ்ர்வ சகோதரர்கள், கலைஞன் என வரிசையாக பல கமல் பாடம் பார்த்ததாலோ என்னவோ நான் ஒரு கமல் ரசிகனாகவே மாறிவிட்டிருந்தேன். சிந்தித்து உணர ஆரம்பத்தபின், பதின்ம வயதின் இறுதியில் முதல் முதலாக நான் பார்த்த படம் இந்தியன். அப்போதுதான் நடிப்பு என்றால் என்ன, சினிமா எவ்வாறு எடுக்கபடுகிறது, என்பது போன்ற அடிப்படை விடயங்கள் புரிய ஆரம்பித்திருந்த காலம்.  அதுவே நான் கமல் ஹாசனை உன்னிப்பாக அவதானிக்க ஆரம்பித்த காலம்.

அப்போதுதான் பதினாறு வயதினிலே படத்தை தொலைக்காட்சியில் பார்க்க நேர்ந்தது. கமல் அந்த இளம் வயதில் ஏற்று நடித்த கதாபாத்திரமும் அதனை அவர் திரையில் கொண்டுவந்திருந்த விதமும் இன்றும் என்னை மெய்சிலிர்க்க வைக்கும். அன்றிலிருந்தே கமல் ஹாசனின் ஒவ்வொரு படங்களாக தேடி அலைந்து பார்க்க ஆரம்பித்தேன். சிகப்பு ரோஜாக்கள், குரு, வறுமையின் நிறம் சிகப்பு, வாழ்வே மாயம், மூன்றாம் பிறை, சலங்கை ஒலி, ஒரு கைதியின் டைரி, புன்னகை மன்னன், நாயகன், சத்யா, குணா, தேவர் மகன், மகாநதி, நம்மவர், குருதிப்புனல் சமீபத்தில் அன்பே சிவம் என கமல் வெளிப்படுத்திய அத்தனை பரிமாணங்களும் என்னை வியப்பில் ஆழ்த்தின. ஒன்றுக்கு ஓன்று தொடர்பில்லாத கதா பாத்திரங்கள், வேறுபட்ட கதை களம், வேறுபட்ட நடிப்பு என்று கமலின் ஒவ்வொரு அசைவும் என்னை பரவசப்படுத்தியது. ரசிகனா இருந்தா இந்தாளு ரசிகன்தான் இருக்கணும்யான்னு என்னை நானே பெருமைப் படுத்திக்கொண்ட காலம் அது. 

எனது ஊரில் என்னோடு இருந்த நண்பர்கள் பலபேரும் ரஜினி அல்லது விஜயகாந்த் ரசிகர்களாகவே இருந்தார்கள், மிக சொற்பம் பேர் அர்ஜுன் ரசிகர்களாக இருந்தார்கள். அவர்களை எல்லாம் ஒரு இளக்காரத்தோடு பார்த்த நாட்கள் அவை. உங்க ஆளு நடிக்கறதெல்லாம் மசாலா குப்பைகள் கமல் ஹாசன் படம் ஒண்ணுதான் படம் என்கிற அறிவுச்செருக்கில் மிதந்த காலம் அது. கமல் ஹாசனால் ஜனரஞ்சக சினிமாவை வழங்கமுடியாது என்பதே பெரும்பாலும் எனது நண்பர்கள் முன்வைத்த குற்றச்சாட்டு. அப்போது நான் கூறியதெல்லாம் இந்த போர்முலா படங்களுக்கெல்லாம் அப்பன் கமல் நடித்த விக்ரம் படமே என்பதே. சகல கலா வல்லவன், வெற்றி விழா, இந்தியன் என பல படங்களில் தன்னை ஒரு கமெர்சியல் அக்ஷன் நாயகனாக கமல் பல தடவைகள் நிரூபித்திருக்கிறார். ஏன் வேட்டையாடு விளையாடு கூட கமலின் அக்ஷன் அவதாரத்திற்கு இன்னும் சாட்சி கூறும்.

கமல் ஹாசனின் கமெர்சியல் பயணம் பெரும்பாலும் நகைச்சுவை படங்களை மையப்படுத்தியதாகவே இருக்கும். நகைச்சுவை என்றால் அதற்க்கு இலக்கணம் கமல் ஹாசனே. கல்யாண ராமன், மைகல் மதன காம ராஜன், காதலா காதலா, அவ்வை சண்முகி, தெனாலி, பஞ்சதந்திரம், வசூல் ராஜா எப்போதும் எனது திரைப்பட சேகரிப்பில் முதல் இடம் பிடிப்பவை. தினமும் மூன்று அல்லது நான்கு தடவை ரிபீட் மோடில் வசூல் ராஜா பார்த்த நாட்களும் உண்டு. நகைச்சுவை சினிமாவின் உச்சம், ஒரு முடிசூடா மன்னன் கமல் ஹாசன். இது அனைத்தும் கமல் ஹாசன், கமல் ஹாசனாக இருந்த காலம். 

இரண்டாயிரத்துக்கு பிற்பட்ட காலத்தில், குறிப்பாக ஆளவந்தான் படம் வெளியானதில் இருந்து கமல் ஹாசன் தன்னை ஒரு சுப்பர் ஸ்டாராக காட்டவே எத்தனித்திருக்கிறார். தமிழ் சினிமாவின் முகவரி, இந்திய சினிமாவின் உச்சம் என்கிற அந்தஸ்த்தை அடையவே முயற்ச்சித்திருக்கிறார். ரஜினியை மிஞ்சவேண்டும் என்கிற எண்ணமே கமல் ஹாசனின் பெரும்பாலான படத்துக்கும் அடிக்கோலாக அமைந்திருக்கிறது. அவ்வப்போது உள்ளே இருக்கும் கமல் ஹாசன் என்கிற படைப்பாளி தலை காட்டிய போதும் பெரும்பாலும் உலக நாயகன் கனவே அவரை ஆட்கொண்டிருக்கிறது. உலக நாயகனுக்கும் கமல் எனும் படைப்பாளிக்கும் இடையிலான போட்டியில் கமல் ஹாசன் தொடர்ந்தும் தோற்றுக்கொண்டே இருக்கிறார். சமீபத்திய கமல் படங்கள் ஒவ்வொன்றும் எனக்கு அதிகப்படியான ஏமாற்றத்தையே கொடுத்துக்கொண்டிருக்கின்றன. 

கமலின் சமீபத்திய படங்களான ............

விருமாண்டி: என்னை மிகவும் கவர்ந்த ஒரு கமல் படம் இது. அதற்க்கு முழுக் காரணமும் ஒரே விடயத்தை இரு வேறு கோணத்தில் அலசும் திரைக்கதையே. ஒரு நடிகனாக, ஒரு கதாசிரியனாக கமல் ஜெயித்த படம். ஒரு இயக்குனராக கமல் முழுத்தோல்வி அடைந்த படம். விருமாண்டியை கூர்ந்து கவனிப்பவர்களுக்கு ஒரு விடயம் தெளிவாக புரியும், படத்தில் கொத்தாள தேவர் மோசமானவன் இல்லை. அவர் அவரது அறிவுக்கு எட்டிய விதத்தில் சந்தர்ப்ப சூழ்நிலைகளை கொண்டு முடிவினை எடுக்கிறார், அவர் எடுக்கும் முடிவுகள் அவருக்கு இருக்கும் தரவுகள் சாட்சியங்கள் அடிப்படையில் நியாயமானதே. விருமாண்டித்தேவராக கமல் நடித்ததனாலும், கமல் என்கிற நாயக விம்பத்தை கட்டமைக்க கமல் என்கிற இயக்குனர் எடுத்த சிரத்தையினாலும், கொத்தாள தேவர் வில்லனாக கற்பிக்கப் பட்டிருப்பார். மோசமான காஸ்டிங் இனாலும் உலக நாயகனுக்கும் கமலுக்குமான போட்டியினாலும் அடி நாதமே சிதைக்கப்பட்டு குற்றுயிராக்கப்பட்டிருக்கும் அந்த படம். படம் முடிந்து வெளியே வந்தபோது எனக்கு ஏமாற்றமே மிஞ்சியது. 

தசாவதாரம்: கமலின் உலகநாயகன் விம்பக் கட்டமைப்பின் உச்சம் தசாவதாரம். ஒரு ஹாலிவூட் தரத்திலான காமேர்சியல் கதை, விறுவிறுப்பான சேசிங், சில இடங்களில் மயிர்கூச்செறியும் தொழில்நுட்பம் எல்லாமே உலக நாயகன் விம்பத்தில் விழலுக்கு இறைத்த நீராகிவிட்டிருக்கும். கிறிஸ்டியன் ப்லேட்சரும், பால்ராம் நாயுடுவும் இன்றும் என்னை கவரும் கதாபாத்திரங்கள். ஏனைய கதாபாத்திரங்கள் எதுவும் கமல் நடித்திருக்க தேவையில்லை என்பது எனது கருத்து. இன்று தசாவதாரம் பார்க்கும் போது தமிழ் சினிமாவின் தலை சிறந்த நடிகன் தானே என ஆயுளுக்கும் எழுதிவைக்கவேண்டும் என்கிற வெறியில் கமல் எடுத்துக்கொண்ட சிரத்தையின் உச்ச வெளிப்பாடாகவே தசாவதாரம் தோன்றும்.

உன்னைப்போல் ஒருவன்: A Wednesday என்கிற இந்திப் படத்தின் உரிமை பெற்ற ரீமேக் இது. பலரும் அசலை விட நகல் ஒரு படி மிகைத்து விட்டதாக மார்தட்டிக் கொண்டபோதும் மூலக் கதையில் இருந்த எதோ ஒன்று நகலில் இல்லை. அது யார் தவறு என தெரியவில்லை. மூலக்கதையின் அடி நாதம் ஷா அனுபம் கேர்ருடன் இறுதியாக பேசும் இடம், அது தமிழில் மாற்றப்பட்டிருக்கும். முழு திரைப்படத்தையும் தூக்கி நிறுத்தும் இடம் அது, தமிழில் உயிரை எடுத்துவிட்ட ஜடமாக வசனங்கள் நிரப்பப்பட்டிருக்கும். நசுருதீன் ஷா நடித்த கதாபாத்திரத்தில் கமல் நடித்தபோது நாயக நடிப்பில் இருத்து கதாபாத்திர நடிப்பிக்கு வர கமலுக்கு இன்னும் நாட்கள் ஆகும் என்றே தோன்றியது. ஒரு சாதாரண மனிதனை தனது நடிப்பு மூலம் கண் முன்னே கொண்டுவந்திருப்பார் ஷா, கமல் சற்று அந்நியமாகவே தோன்றினார். உன்னைப் போல் ஒருவன் மூன்றாவது முறையாக கமல் ஏமாற்றிய படம்.

மன்மதன் அம்பு: எப்போதும் கமல் ஒரு புது முயற்சியில் ஈடுபடும் போது எத்தனையோ விமர்சனங்கள் இருந்தாலும் வணிக வெற்றிக்காக மேற்கொண்ட விட்டுக்கொடுப்புகளாகவே அவற்றை மன்னிக்கும் எனக்கு மன்மதன் அம்பு பேரதிர்ச்சி. விருமான்டியோ, தசவதாரமோ மார்க்கெட்டிங் எனும் கோட்பாட்டுக்குள் கமலின் தவறுகளை மன்னித்துவிட்ட போதும், உன்னைப் போல் ஒருவனில், நேட்டிவிட்டிக்காக கதை மாற்றப்பட்டது என்று சமாதானம் சொன்னபோதும் மன்மதன் அம்பு மன்னிக்கவே முடியாத ஏமாற்றம். அதுவும் ரவிக்குமார்-கமல்-ரொம் கொம் எனும்போது ஏமாற்றம் அளவு கடந்தது. கமல் ஐம்பதுக்கு பிற்பாடு கமலாகசனுக்கு வந்த உலக நாயக மிதப்பே அதற்க்கு காரணம் என படுகிறது. நான் எதை கொடுத்தாலும் வாங்கிக்கொள்ள விசிலடிச்சான் குஞ்சுகள் பலர் இருக்கிறார்கள் என எண்ணிக்கொண்டாரா தெரியவில்லை. இனிமேல் கமல் படம் பார்ப்பதே இல்லை என நானும் மொக்கராசுவும் சூடம் ஏற்றி சத்தியம் பண்ணும் அளவுக்கு ஒரு அனுபவம் மன்மதன் அம்பு. 

விஸ்வரூபம் ட்ரெயிலர் படம் மீது பெரிய நம்பிக்கையை ஏற்படுத்தவில்லை, இருப்பினும் வேட்டையாடு விளையாடு போன்ற ஒரு முழு கமெர்சியல் என்டேர்டைனராக அமைந்தால் பெரு மகிழ்ச்சி. இனிவரும் காலங்களில் கமல் உலகநாயன் விம்பத்தை கலைந்து கமல் ஹாசன் எனும் நடிகனாக, கமல் ஹாசன் எனும் இயக்குனராக மாறவேண்டும் என்பதே ஒரே ஆசை. உலக நாயக விம்பத்துள் மூழ்கி கமல் எனும் மகா கலைஞனை தொலைத்துவிட்ட பாவம் கமலுக்கு வேண்டாம்.

டிஸ்கி: ஹாலிவூட் பிரவேசம் கமலுக்கு வெற்றிகரமாக அமைய வாழ்த்துக்கள்.